All posts by : cfiott

Ġieli ġratilkom li torbtu lil xi ħadd b’xi sigriet u tinduna li dak li jkun mar ixandar ma’ kullimkien dak li tkun għedtlu bejn erba’ ħitan? Hija ħaġa li normalment tkisser il-fiduċja f’dik il-persuna. Jew inkella, isbaħ minn din, xi ħadd jiġi jgħidlek: “Lilek biss qed ngħid,” u int tkun taf li fil-verità jkun ġa qal lil nofs ir-raħal! Jiġru dawn l-affarijiet u jew teħodhom b’nofs ċajta, jew tiddispra, jew twiegħed lilek innifsek li nies bħal dawn ma temminhomx jew inkella ma tgħidilhom xejn. 

Ġesù hekk ġralu fil-Vanġelu tal-lum. Wara li fejjaq lit-trux u mbikkem wissa biex ma jingħad xejn minn dak li kien qed jagħmel u dawn iktar ma wissiehom aktar xandruh. Tifhmu li dawn tant kienu impressjonati b’dak li għamel Ġesù li ma setgħux ma jxandruhx.  Għamlu sew? Min jaf! Li ma obdewx m’għamlux sew, imma mur żommhom!

Forsi tiġina li nsaqsu: “Imma dan Ġesù l-għala ma riedx li ħaddieħor ma jsirx jaf li kien hu li jfejjaq?” Ħafna drabi fil-Vanġelu ta’ San Mark insibu li Ġesù jordna lil min ikun fejjaq biex ma jgħid xejn. Imma għaliex? Kien jaqbillu li jsiru jafuh. Hekk seta’ juri biċ-ċar li hu l-Messija, u iktar nies jersqu lejh, iktar nies ifiqu, iktar nies isiru jħobbuh, iktar nies isiru jafu l-Vanġelu. Mela għalfejn dal-ħabi kollu?

Ġesù ma riedx li toħroġ informazzjoni żbaljata jew jingħataw impressjonijiet ħżiena. Ġesù ma riedx li hu jiġi meqjus bħala xi ħadd li jagħmel il-magics, bħala xi ħadd li joffri ħajja faċli, li jwiegħed l-ilma jiżfen. Fl-aħħar tal-Vanġelu Ġesù ma jaħbix iktar: “Morru fid-dinja kollha, xandru l-Evanġelju lill-ħolqien kollu” (Mk 16, 15). Allura għalfejn jaħbi issa, jekk wara xandar kollox bil-miftuħ? Jaħbi issa, għax faċli setgħet tingħata l-impressjoni li Ġesù kien qed iwiegħed dixxipulat faċli, dixxipulat nieqes mis-salib. Li tkun dixxiplu ta’ Ġesù jfisser li terfa’ salibek kuljum u timxi warajh. Fejqan mingħajr l-aċċettazzjoni tas-salib faċli jsir farsa ta’ min hu Ġesù. Qabel ma jgħid kollox bil-miftuħ, Ġesù kellu jgħaddi mill-prova tas-salib.

Hu stess kellu jegħreq l-għaraq tad-demm biex jaċċetta r-rieda t’Alla f’ħajtu. Xi ħadd jista’ jlumek li m’intix taċċetta dak li qed jiġrilek f’ħajtek, imma l-fatt stess li qed tissielet biex tifhem u taċċetta, dik stess fiha nfisha hija talba: “Missier jekk jista’ jkun ħa jitbiegħed minni dan il-kalċi, imma mhux li rrid jien, imma li trid int” (Mk 14, 36). Ġesù, għall-kuntrarju tan-nies tad-dinja, ma jwigħedx l-ilma jiżfen. Ġesù huwa reali u fil-verità magħna: “Fid-dinja tbatu jkollkom, imma agħmlu l-qalb, jien irbaħt id-dinja” (Ġw 16, 33).

Ġesù jfejjaq biex jagħti sinjal li hu l-Messija. Il-fejqan huwa biss sinjal ta’ xi ħaġa ikbar. Il-fejqan huwa sinjal li hu kien dak li kellu jiġi. Il-fejqan kien mifhum li jwassal lin-nies li jemmnu Hu min kien. Messija iva, imma li kellu jimrad u jbati. “Ħa fuqu l-mard tagħna” (Is 53, 4), tgħidilna l-iskrittura. Proprju din li ma setgħux jifhmu ħafna nies, u li nsibuha diffiċli nifhmu aħna wkoll: “Salva lill-oħrajn, ħa jsalva lilu nnifsu” (Lq 23, 35). Ma ninsewx li l-fejqan fiżiku fih innifsu mhux etern. Dawk kollha li fejjaq Ġesù xorta reġgħu mardu u mietu. Lazzru ħa l-kedda li kellu jmut darbtejn!

Jekk aħna nibbażaw il-fidi tagħna fuq il-fejqan fiżiku, inkunu qed nitilfu ħafna. Il-fejqan, ma ninsewx, huwa sinjal ta’ verità ikbar. Mhux ta’ b’xejn li mbagħad, meta naraw li l-fejqan fiżiku ma wasalx, nibdew naħsbu ħafna affarijiet li mhumiex veri u nispiċċaw ngħidu: “Qed nitlob ħażin”, “M’għandix fidi”, “Alla ma jismagħnix”, “Alla bil-preferenzi”. Il-Knisja stess tgħallem li l-mirakli huma biss xi ħaġa straordinarja u mhux ta’ kuljum.

Ovvjament il-mard huwa xi ħaġa kerha ħafna. Il-mard joħroġ minnek reazzjonijiet li qatt ma kont timmaġina li kienu fik. Il-mard jumiljak. Il-mard ikexkxek meta tara lill-maħbubin tiegħek ibatu u anke jmutu. Ħadd ma jrid jimrad, lanqas jien serrħu raskom, u ħadd ma jrid jara l-maħbubin tiegħu jimirdu u jbatu. Madanakollu hemm fejqan li jmur ’l hemm minn dak li hu fiżiku. F’ħajti nħossni ffurtunat li ltqajt ma’ nies li fil-mard tagħhom fejqu lili. Nies li magħhom ma sarx miraklu imma huma kienu miraklu ħaj bid-dija li ħarġet minnhom fil-mumenti diffiċli tagħhom. Hemm tibda temmen li t-tbatija tista’ tkun redentiva wkoll.

Fil-fond ta’ qalbi nixtieq li ħadd iktar ma jimrad, fil-fond ta’ qalbi nixtieq li l-mediċina tagħmel tant żviluppi li teqred il-mard kollu, fil-fond ta’ qalbi nixtieq li l-mirakli jkunu the order of the day. Fil-fond ta’ qalbi nixtieq li ħadd ma jbati, ħadd ma jimrad u ħadd ma jmut. Madanakollu nitlob li fil-mard tiegħi nkun kapaċi nfejjaq. Nitlob li anke jien, int u kulħadd ikun eżempju ta’ tbatija li ssalva. Nitlob li nidħlu f’dik il-profondità li l-fejqan qabel fuq barra jsir fuq ġewwa. Nitlob li nifhem li l-aċċettazzjoni tas-salib, mhux dik passiva imma frott l-għaraq tad-demm, hija wkoll talba.

Ma nafx ġilix iltqajtu ma’ xi ħadd li jagħmel mit-tindif l-iskop ewlieni tal-eżistenza tiegħu. Miskin jagħmel nofs ħajtu jnaddaf u n-nofs l-ieħor l-affarijiet li suppost jagħmel. It-tindif iqisu bħala prijorità u jiġġustifika din l-ossessjoni billi jgħid li hu jnaddaf għax ħaddieħor ma jnaddafx. Niftakar xi ħadd jgħidli li qabel jorqod inaddaf id-dar kollha ma jmurx billejl jinqala’ xi ħaġa, ikollu jiġi t-tabib u jmur jgħid li għandu d-dar maħmuġa. Niftakarni ngħidlu li dan huwa twemmin fieragħ imma ma tax kasi u t-tabib billejl ma ġie qatt. 

Il-Fariżej milli jidher ukoll kellhom xi tip ta’ fissazzjoni fuq it-tindif. L-evanġelista jagħmel lista twila ta’ kemm kienu jnaddfu u jitnaddfu biex ir-riti tagħhom ikunu mill-isbaħ u forsi wkoll biex tassew ikunu validi. L-attenzjoni esaġerata għat-tindif minn barra hija ħafna drabi l-ikbar xhieda ta’ konfużjoni u diżordni minn ġewwa. 

Huwa proprju ghalhekk li l-Mulej jgħolli l-livell tad-diskors tiegħu u mill-ħasil tal-borom u l-ktieli jgħaddi għall-indafa u n-nuqqas tagħha fil-qalb tal-bniedem. 

Huwa inutli li lil Alla tqimu bix-xufftejn biss imma l-qalb hija mili ’l bogħod minnu. X’jiswa li tippreżenta ruħek quddiem Alla l-imbierek b’mod mill-iktar perfett imma dan tagħmlu iktar imqanqal minn kemm il-prestazzjoni tat-talba tiegħek ser tkun perfetta milli mix-xewqa li lil Alla tħobbu ftit iktar jew inkella tħallih iħobbok ftit iktar. X’jiswa li torganizza liturġiji twal u perfetti imma li ma tkun ressaqt l-ebda qalb lejn Alla? 

X’jiswa li naħli ħajti nipprova npenġi lili nnifsi perfett quddiem Alla u quddiem l-oħrajn meta fil-fond ta’ qalbi jien dgħajjef forsi iktar min-nies li niġġudika? Id-dnub ikrah u mhux tajjeb li tkun midneb imma l-ipokreżija hi ferm iktar kerha. 

Ħafna drabi kif ngħixu l-ħajja spiritwali tagħna huwa ferm iktar rigward impressjoni milli realtà. Qisu għandna fina din ix-xewqa li bl-għemejjel tajba tagħna nimpressjonaw lil xi ħadd. Ġesù huwa ċar ħafna li la t-talb, la s-sawm u lanqas il-karità mhuma qegħdin hemm la biex nimpressjonaw lil Alla u lanqas lill-oħrajn u lanqas lilna nfusna u din problema oħra tafux. Kultant naħsbu li għax nagħmlu l-opri tajba b’mod impekkabbli aħna tajbin. Jekk saċerdot jipprietka tajjeb allura jkollu t-tentazzjoni li jibda jaħseb li qed jgħix dak li jipprietka. Jekk xi ħadd jagħmel opra tajba u jfaħħruh in-nies jibda jaħseb li huwa tajjeb daqs it-titli sbieħ li n-nies tkun qed tattribwilu. 

Imma l-bniedem jinkixef fil-kamra ta’ ġewwa u fuq l-affarijiet li joħorġu hemm, meta nkunu fis-satra ta’ kamritna u qalbna toħroġ il-verità ta’ aħna min aħna fil-verità. L-imġiba tiegħi fil-privat tikxef jien min jien fejn m’hemmx folla tfaħħarni jew iċċapċapli. Kemm iltqajt ma’ nies li fuq nies viċin tagħhom bi kliem jixbah lil dan li ġej jgħiduli: “Tiġġudikahx meta jkun miegħek imma meta jkun magħna, miegħek jagħmilha tal-qaddis imma d-dar qisu l-imxajtan.”

Nitolbu ’l-Mulej jagħtina l-grazzja li ma jkunx hemm differenzi kbar bejn ġewwa u barra, bejn dak li jidher u dak li ma jidhirx, bejn il-privat u l-pubbliku. Inżommu f’moħħna u f’qalbna l-kliem ta’ Ġesù: “Missierek li jara dak li hu fil-moħbi jroddlok hu” (Mt 6, 16). Jekk il-Fariżej ikomplu jedhew mal-ktieli u l-borom, affarihom, aħna nippruvaw mod ieħor.

Il-Lhud ma qablux bejniethom meta Ġesù tkellem dwar il-ħobż tal-ħajja. Dan il-Vanġelu nkiteb meta l-esperjenza tal-Ewkaristija kienet fl-aqwa tagħha; ma kienx biss twemmin imma prassi ta’ għajxien. L-Insara fil-bidu nett nett bdew jiċċelebraw l-Ewkaristija. Kien għalihom l-Għid ta’ kull nhar ta’ Ħadd. Lil Ġesù issa kienu draw jagħrfuh waqt il-qsim tal-ħobż. L-istess bħalma kienu għarfuh id-dixxipli ta’ Emmaus.

Issa, ma kinux jagħrfuh iktar mis-sinjali u l-għeġubijiet:

• L-Appostli kollha mietu martri u ħadd minnhom ma qam mill-mewt;

• Dawk in-nies li kien qajjem Ġesù mill-mewt mietu wkoll;

• Pietru li wkoll għamel mirakli ta’ fejqan, kienu ilhom li qatluh;

• Il-ħeġġa ta’ Pawlu wkoll intfiet ghax anke lilu qatlu.

Mela x’kien baqa’ ġaladarba l-glorja għebet u baqa’ biss il-persekuzzjoni?

Relazzjoni intima mal-Mulej Ġesù.

Anke aħna spiss ngħaddu mid-dlam, mirakli ma jsirux. Kemm-il darba staqsejna lill- Mulej għaliex mhux jismagħna jew kemm ser idum ma jismagħna, forsi fil-fond inkunu mxennqin għal miraklu wkoll. Inħossuna tassew qed inġorru s-salib, norqdu naħsbu dwaru u nqumu naħsbu fih u forsi fis-solitudni ta’ tbatija nindunaw li hemm bżonn nagħmlu xi ħaġa. Illum Ġesù għall-mistoqsija dwar x’kellhom jagħmlu biex iwettqu l-opri ta’ Alla, Ġesù jweġibhom li kellhom jemmnu f’dak li hu bagħat iġifieri fih. 

Relazzjoni personali ma’ Ġesù tagħtik ħafna iktar mill-isforzi tiegħek biex takkwista l-ħobż, sens fil-ħajja.

Jekk tħossok waħdek, f’intimità miegħu, issibu jgħidlek li hu dejjem miegħek sakemm itul iż-żmien.

Jekk ċaħduk sħabek stess issibu jgħidlek li int hieni għax għajruk, ippersegwitawk u qalgħu kull xorta ta’ gideb fuqek minħabba fih. Anzi jgħidlek ukoll li ħlasek kbir fis- smewwiet.  

Jekk tħoss li ma jemmnukx, il-Mulej jgħidlek li hu t-Triq, il-Verità u l-Ħajja, iġifieri m’hemmx għalfejn jemmnu lilek. 

Jekk tħossok qed tbati wisq tisimgħu jgħidlek sabiex tmur għandu jekk int imħabbat u mtaqqal u hu ser jagħtik is-serħan li qalbek tant tixtieq.

Jekk int fid-dlam ser tisimgħu jgħidlek li hu d-dawl tad-dinja.

Jekk tħossok mitt minn ġewwa ser tisimgħu jgħidlek li Hu l-qawmien u l-ħajja u li kull min jemmen fih ma jmut qatt. 

Jekk dnubietek itaqqluk u tħossok għadek iġġorr id-dnub tiegħek għax kulma tagħmel ifakkrek fih, jew inkella jfakkruhulek ser tisimgħu jgħidlek li ħadd mhu ser jikkundannak u li dnubietek maħfura. 

Aħna nemmmu li dan kollu mhux biss nisimgħuh imma nikluh, isir parti minna u aħna nsiru dak li nieklu. L-Ewkaristija hija dan kollu flimkien mal-għotja tagħna nfusna. Kif Ġesù jagħmel bil-ħobż (jieħdu f’idejh, ibierku, irodd il-ħajr, jaqsmu u jagħtih) hekk imsejħa nkunu aħna. Inkunu demm li jixxerred għall-bnedmin kollha.

Huwa hu biss li jaqta’ l-ġuħ u l-għatx għall-ħajja. Allura fittxu lil Ġesù, agħtuh il-ħin, tgħallmu frażijiet bl-amment mill-Vanġelu, araw li jkollkom fikom l-istess sentimenti li kienu fi Kristu Ġesù, aqdu bil-ferħ, tħallu lil ħadd jisraqhulkom.

Meta nstema’ dan il-Vanġelu l-ewwel darba ħadd ma fehmu. Ma fehmuhx is-semmiegħa ta’ Ġesù, tant li ħafna minnhom wara dan id-diskors ħallewh. Anqas fil-bidu tal-esperjenza Nisranija, mhux mill-ewwel sab art fejn inibbet.

Is-semmiegħa ta’ Ġesù ħassew ruħhom skandalizzati għax Ġesù donnu kien qed ixerred ideat kannibalistiċi, xi ħaġa li kienet projbita mil-liġi Lhudija. L-esperjenza Nisranija wkoll sabet diffikultà li tilqa’ dan il-kliem minħabba kurrenti li kienu iktar jeżaltaw id-divinità ta’ Ġesù milli l-umanità tiegħu. Dawn it-talin kienu jaraw f’Ġesù n-natura tiegħu ta’ Alla u jħassru n-natura tiegħu ta’ bniedem, b’konsegwenza li allura anke fil-ħajja tal-bniedem eżaltaw l-ispiritwalità b’dannu għal dik li hi l-umanità. U Ġesù jgħid: “Ġismi huwa ikel tassew, u demmi huwa xorb tassew” (Ġw 6, 55).

Ġesù, f’bilanċ assolut, jispjega li ġismu huwa ħobż ħaj li nieżel mis-sema, fl-istess ħin huwa ħobż tassew, realtà purament umana.

Anke aħna jista’ jiġrilna li ninsew l-umanità tagħna u naħsbu li l-ħajja Nisranija jew il-ħajja fl-ispirtu hija ħarba minn dak kollu li hu tal-bniedem. Kemm qaddisin kienu għaqlin f’dan u ma ċaħdu qatt l-umanità ta’ Alla u tagħhom. Kemm għoġba f’San Franġisk t’Assisi quddiem il-misteru ta’ Ġesù magħmul bniedem. Anke jekk San Franġisk, għal xi mument ħaseb li l-ħajja Nisranija hija biss tgħakkis tal-ġisem, fl-aħħar jasal jitlob maħfra lill-“Fratello Corpo” tal-ħsara li kien għamillu. L-istess Dun Ġorġ Preca f’Malta kemm għożża għal dan il-misteru tal-għaġeb li Alla jsir bniedem. U xi ġmiel ta’ frażi dik li tmur tgħid Santa Tereża t’Avila, waħda minn dawk li waslet fil-quċċata tal-ispiritwalità Nisranija: “Jiena naraha ħaġa ċara li, jekk irridu nogħġbu lil Alla u nirċievu grazzji kbar mingħandu, hu jrid iwasslilna kollox permezz tal-Umanità qaddisa ta’ Kristu” (De Libro Vitae).

Sfortunatament ġara li, matul is-sekli, it-tentazzjoni li nikkonċentraw fuq il-ħajja tal-ispirtu biss, b’esklużjoni tal-umanità tagħha, rebħet u bosta kienu d-drabi fejn l-esperjenza umana, il-ġisem u s-sesswalità tiegħu ġew mogħtija l-ġenb. Ftit irrealizzajna li meta ma tagħtix kas l-esperjenza umana u l-qawwa tal-għaġeb li ġġorr fiha, illum jew għada tirritorna b’qawwa akbar li tasal tagħmel il-ħsara lilek u lil ta’ madwarek. L-ebda esperjenza Nisranija, anke l-ikbar waħda mistika, ma tistax tirnexxi jekk ma tgħaddix mill-ġisem.

Kien Alla li għażel din it-triq. Kien hu li l-ikbar misteru ta’ mħabbtu, ma sabx mod ieħor kif jurih jekk mhux billi Ibnu jsir laħam. Meta Alla sar bniedem qaddes kull realtà umana. Allura x’inhi l-vokazzjoni tagħna? Waħda, dik li nsiru aktar bnedmin, li nkunu komdi fir-realtà tagħna l-bnedmin. Jekk naqgħu għat-tentazzjoni li rridu ħajja spiritwali, mingħajr dak kollu li jagħmel ir-realtà umana tagħna, insiru riġidi, morda u nkunu qed inħejju ruħna għal żbalji kbar.

Alla qed isejjaħlek biex inti tkun bniedem tassew; biex tħalli dak li hu ta’ Alla jsebbaħ dak kollu li hu tal-bniedem. Allura poġġi quddiemu dak kollu li int; dik il-biċċa ħobż dgħajfa li int; bil-fraġilitajiet kollha li għandek u jkun Hu li dik il-biċċa ħobż dgħajfa jagħmilha, mhux biss denja ta’ Alla, imma Alla. Għalhekk taħbi xejn minnu, għaliex kollox Alla għamel, u int kif int, int denn tiegħu.

Bħalna dawn! Igergru! Kieku Maltin abbli kienu jużaw l-istess kelma tagħna… “Uff.” 

Kellhom ftit raġun li jgergru, mhux hekk! Barra li min igerger dejjem jaħseb li għandu raġun, imma huwa minnu li lil dawn ma ttihomx tort. Huma kienu qed jibbażaw il-fidi tagħhom fuq il-fatti, u l-fatti kienu jgħidu li dan Ġesù ma setax kien dak li kien qed jgħid li hu. L-oriġini tiegħu hija bil-wisq iktar sempliċi minn ta’ xi ħadd li nieżel mis-sema.

Ġesù malajr jaqtgħalhom fil-qasir u jgħidilhom biex ma joqogħdux igergru. Jgħidilhom ukoll li min jemmen għandu l-ħajja ta’ dejjem. X’qabża din Sur Ġesù, mit-tgergir għall-ħajja ta’ dejjem!

U proprju hekk hu. Min jemmen jirnexxilu jmur iktar ’il bogħod mill-fatti. Min jemmen jirnexxilu jara fil-bogħod, joħlom kbir u jwettaq għeġubijiet. Kieku l-Lhud emmnu kienu jmorru ħafna ’l bogħod mill-fatt li lil missieru u lil ommu kienu jafuhom, imsieken waqfu wisq fuq l-ovvju. 

Il-fidi twasslek tara lil Alla, fejn il-fatti jgħidulek li Alla mhux hemm. Hemm min ra lil Alla anke f’kamp ta’ konċentrament! 

Il-fidi twasslek ma taqtax qalbek hemm fejn tħossok li missejt il-qiegħ. Alla huwa ikbar mill-fatti anke jekk huma fatti konkreti ħafna. Alla dejjem ser jiftaħ triq, mhux neċessarjament it-triq li rridu aħna, imma t-triqat tiegħU.

Ħafna drabi jiġrilna li niddeċiedu fuq il-fatti u mhux fuq il-Fatt. Il-Fatt hu li Alla kapaċi u kapaċi ħafna iktar minna. Kemm drabi niddeċiedu mqanqlin mill-biża’ u mhux mill-profezija?! Kemm kapaċi nemmen li Alla kapaċi jqajjem ulied għalih anke minn borġ ġebel minsi? Naħseb tiftakru x’tgħid il-Bibbja, frażi li anke Ġesù jikkwotaha: “Il-ġebla li warrbu l-bennejja saret il-ġebla tax-xewka, bis-saħħa tal-Mulej seħħ dan. Ħaġa tal-għaġeb f’għajnejna” (Mt 21, 42). Jużaha Pietru wkoll meta fir-4 Kapitlu tal-Atti tal-Appostli jakkuża lill-Kapijiet tal-poplu u x-xjuħ. Jgħidilhom li Ġesù huwa dik il-ġebla li ġiet imwarrba, imma saret il-ġebla tax-xewka, iġifieri l-ġebla li żżomm il-bini kollu (At 4, 11). 

Il-fatti jridu jkunu trampolin biex wara li nitgħallmu minnhom, nimxu għall-azzjoni. Ħafna drabi neħlu fihom. Allura arana nerġgħu u nerġgħu nistudjaw is-sitwazzjoni attwali, nagħmlu studju, niktbu dokument bir-riżultati u nibqgħu hemm. L-identifikazzjoni tal-problema mhix ekwivalenti għal xi tip ta’ soluzzjoni.  

Anke fil-ħajja personali tista’ tiġrilna din; arana jkollna sitwazzjoni fil-ħajja, u l-fatti juruna b’mod ċar li ma tista’ tagħmel xejn biex is-sitwazzjoni tirranġa; allura tibqa’ ssemmi l-fatti biex tkompli tikkonvinċi lilek innifsek li m’hemm xejn x’tagħmel. U jista’ jkun proprju hekk il-każ. Madanakollu jrid jasal żmien fejn dawk il-fatti ma tħallihomx jikkundizzjonawk, tara xi tkun tgħallimt minnhom u timxi ’l quddiem. 

Kultant, dan, jiġrilna anke lilna, l-evanġelizzaturi, li suppost inxandru lill-Irxoxt. Nispiċċaw naqgħu f’monotonija ta’ diskorsi daqslikieku l-fatti ta’ Ewropa mingħajr Alla, ta’ soċjetà post-Kristjana għandhom l-aħħar kelma. Soċjetà post-Kristjana, seminarji b’inqas nies, ħajja Nisranija li abbli tilfet l-effett fuq is-soċjetà, valuri minsija jew mibdula, mhumiex sinjal ta’ mewt, imma sinjal li Alla qed iħejji triq, qed jipprepara ġens biex iwassalna għal ferħ akbar u ħajja aħjar. Għalhekk, ejjew nieqfu nkunu apokalittiċi, daqslikieku Alla nesa jew reġa’ lura mill-wegħdiet tiegħu. Abbli s’issa mxejna bil-modi u fit-triqat tagħna, jasal żmien fejn nibdew nimxu bil-modi u fit-triqat tiegħU.

L-ewwel pass hu li nemmnu li Alla ser jagħti l-ħajja liċ-ċirkustanzi li fihom proprju ħajja ma tidhirx. F’kull mewt, u din hemm bżonn nemmnuha, hemm nibbieta ta’ ħajja. Fittixha!

Il-Mulej iqawwikom fit-tama u jagħtikom is-sliem.

Il-Kapitlu 6 tal-Evanġelju ta’ San Ġwann fih naqra tgerfix dwar it-traġitt li għamel Ġesù f’jumejn. Jibda billi jgħid li Ġesù jitlaq lejn in-naħa l-oħra tal-baħar tal-Galilija b’ħafna nies jimxu warajh. Ma kinux mexjin warajh għalxejn imma għax kienu raw is-sinjali li kien għamel fuq il-morda. Mill-pjanura jmur fuq l-għoljiet. Jinkwieta li kienu bil-ġuħ u jkattar il-ħobż u l-ħut. Malli kielu u xebgħu, jiġu għalih u hu jaħrab lejn l-għoljiet għax riedu jagħmluh sultan. 

Filgħaxija d-dixxipli jaqbdu d-dgħajjes biex jerġgħu jaqsmu l-baħar imma hu jinżel minn fuq l-għoljiet u jimxi fuq l-ilma. Id-dixxipli jibżgħu imma jridu jtellgħuh fid-dgħajsa imma d-dgħajsa tmiss max-xatt hekk kif Ġesù ser jitla’ fuqha. 

L-għada n-nies jitħawdu waħda tajba. Dawn raw li max-xatt kien hemm dgħajsa waħda u ċerti li Ġesù ma kienx tela’ mad-dixxipli fuq id-dgħajsa. Ċerti li d-dixxipli marru waħidhom. Mela Ġesù fejn hu? Waslu xi dgħajjes oħra u Ġesù mhux fuqhom lanqas. X’taħwid, mela fejn hu? Fl-aħħar imorru Kafarnahum u jsibuh proprju n-naħa l-oħra tal-baħar u ovvjament, għax ma jafux li Ġesù kien għamel passiġġata fuq l-ilma billejl, isaqsuh: “Rabbi, meta ġejt hawn?” (Ġw 6, 25). Tħawdu msieken, tħawwadt jien u ċert li anke intom wara li qrajtu dawn it-tliet paragrafi. 

Imma l-Mulej hekk jagħmlilna meta nfittxuh għal raġunijiet żbaljati. Hu stess jgħidilhom li qed ifittxuh mhux għax raw is-sinjali imma għax kielu u xebgħu u fejn tidħol iż-żaqq ara min jipprova jwaqqafna. Il-ġuħ ikrah! Ġesù mhux furnar; kieku kien jiftaħ forn u jmur joqgħod Ħal Qormi u lanqas tal-grocer. Dawn ituk servizz u servizz tajjeb imma ma jtukx sens il-għala tgħix. 

Il-Mulej jagħtik il-ġuħ u l-għatx għal sens fil-ħajja. Il-ġuħ u l-għatx huwa għall-persuna tiegħu, għall-mod kif jaħseb hu, għall-mod kif jgħix, għal dak Alla li jixtieq jirrivelak. Li temmen li hu jista’ jagħmel dan kollu, li jista’ jtik sens għal ħajtek, li kollox jagħmel sens anke dak li jidher totalment bla sens. Jekk temmen li hu jista’ jagħmel dak kollu diġà bdejt taqta’ l-ġuħ u diġà bdejt taqta’ l-għatx. 

Ġesù qed jgħid li hu l-ħobż tal-ħajja. Tajjeb li nirriflettu anke dwar l-Ewkaristija u b’liema spirtu naslu sa quddiem l-artal biex nirċevuha. Mhux qed infisser dwar ir-riverenza, il-qima u r-rispett li għandu jkollna lejha. Dak neħduh b’ovvju. Imma qed nitkellem dwar id-diviżjonijiet li jkollna fina kull darba li nieklu l-ġisem ta’ Kristu imma l-attenzjoni hi biss fuq it-tqarbina u mhux ukoll fuq il-Kelma tiegħu li titma’ lil qalbna. Din hi diviżjoni kerha fina li kapaċi nkunu devoti u nieqfu hemm. Kull darba li naħseb li tqarbina hi xi magic u jekk nitqarben ser infiq jew ninbidel b’mod awtomatiku qed niżbalja bil-kbir. Spiss jiġrilna li ninsew li l-Ewkaristija ma tistax tinqata’ mis-smigħ tal-Kelma ta’ Alla. L-Ewkaristija ma tistax issib postha jekk mhux f’mixja ta’ fidi ma’ komunità li temmen. Hekk biss tasal tfassalli ħajti u tagħmilni Nisrani. 

L-Ewkaristija hija l-ġisem tal-Mulej; ma tbiddilniex f’daqqa għax kieku biżżejjed li nitqarben dakinhar tal-preċett u jikkanonizzawni dakinhar filgħaxija. Kieku nafu wkoll fejn ikunu l-qaddisin; dawk li ssibhom il-knisja filgħodu u filgħaxija, imma nafu li l-ħajja mhux hekk, li la min jitqarben kuljum u anqas min iqaddes kuljum għadu ma jista’ jgħid li sar Ġesù ieħor. Anzi, jekk tisimgħu lil xi ħadd jgħid li sar xi Ġesù ieħor aħarbu minnu, jew minnha. Imma l-Ewkaristija hija l-esperjenza li jien kuljum nomgħod lill-Mulej u nħallih isawwarni bil-mod il-mod, filwaqt li jħallini jien, ibiddilni fih. Nintgħaġnu f’għaġna waħda. Misteru dan, imma veru!

Il-Vanġelu li għadu kif ġie mxandar għalina llum ikompli ma’ dak li ġie mxandar għalina l-Ħadd li għadda. Ġesù jagħmel ikla kbira, ġeneruża, differenti minn dik ta’ Erodi li fl-ikla tiegħu jieklu biss dawk li huma diġà mxebbgħin. Fl-ikla ta’ Erodi ma jingħata xejn b’xejn, għax tittieħed il-ħajja tal-profeta – Ġwanni l-Battista. L-ikliet tal-għonja jagħtu l-impressjoni li huma b’xejn, imma huma ikliet il-qerq. Huma dawk l-ikliet li suppost qed jagħtuk ħafna, imma wara ftit jerġa’ jaqbdek il-ġuħ. Huma dawk l-ikliet li jagħtuk l-impressjoni li ser jissodisfawlek il-bżonnijiet tiegħek; imma ħafna drabi tibqa’ bil-ġuħ jew inkella agħar minn hekk ikollok tħallas prezz qares tal-ikla li tkun kilt. Huma ikliet illużorji li jeħdulek il-libertà. 

L-ikla ta’ Ġesù hija b’xejn, u ma tilludikx li wara li ser tiekol mhux ser jerġa’ jaqbdek il-ġuħ. Ġesù jagħti l-ikel b’xejn biss biex iwasslek għal livell ieħor ta’ ġuħ u livell ieħor ta’ ikel. Ġesù jitimgħek iva, imma mal-ikel ipoġġilek mistoqsija: “X’inhu l-veru ġuħ tiegħek?” Jagħtik ukoll is-soluzzjoni! Inti tixba’ biss jekk tiekol lilu. “Missirijietkom kielu l-manna fid-deżert u mietu” (Ġw 6, 49). 

Ġesù jħoss il-bżonn li, wara li jagħmel il-miraklu tal-ħobż, jispjega li dak li għamel hu permezz tal-miraklu huwa biss sinjal. Ġesù jaf li l-intenzjoni tan-nies mhix li jaqtgħu l-ġuħ tal-ħajja, tas-sens, tal-iskop għal xiex tgħix, imma huwa biss li jaqtgħu l-ġuħ li jgħaddi u jfiqu minn mard, li terġa’ timrad bih. Infatti dan ir-rakkont jiftaħ u jagħlaq billi jikxef x’kienu l-intenzjonijiet tan-nies ta’ żmien Ġesù: “Ħafna nies marru warajh, għax raw is-sinjali li kien jagħmel bil-fejqan tal-morda” (Ġw 6, 2) u jispiċċa: “Imma Ġesù, meta ntebaħ li kienu ġejjin biex jeħduh bilfors ħalli jagħmluh sultan, reġa’ warrab waħdu lejn l-għoljiet” (Ġw 6, 15). In-nies riedu biss ifiqu fiżikament u jaqtgħu l-ġuħ permezz ta’ biċċa ħobż! 

U aħna xejn m’aħna differenti minnhom! Il-ġuħ tagħna ħafna drabi huwa dak il-ġuħ tal-mument. Anzi, ejja nkunu naqra iktar fil-verità magħna nfusna. Kull wieħed u waħda minna nbatu l-ġuħ; ġuħ għall-apprezzament, ġuħ għall-imħabba, ġuħ għall-approvazzjoni, ġuħ li nkunu stmati, li tgħaddi tagħna u ħafna drabi naqtgħu dan il-ġuħ b’affarijiet li jgħaddu; nixtru xi ħaġa li tiswa, nidħlu f’relazzjoni li mingħalina ħa taqtgħalna l-ġuħ għal ftit imħabba, nagħmlu minn kollox biex nidhru u nkunu apprezzati. Abbli, forsi, għandna ħjiel tal-ġuħ li hemm fina, imma nippruvaw naqtgħuh, b’affarijiet li, bħall-ħobż, jaqtgħulna l-ġuħ għal mument u jagħmluna iktar bil-ġuħ. 

U l-Kelma ta’ Ġesù hija ċara magħna: “Tħabtu mhux għall-ikel li jgħaddi, iżda għall-ikel li jibqa’ għall-ħajja ta’ dejjem, dak li Bin il-Bniedem jagħtikom” (Ġw 6, 27). Ġesù jkompli jkun iktar ċar magħna: “Jiena hu l-ħobż tal-ħajja. Min jiġi għandi ma jieħdu qatt il-ġuħ, u min jemmen fija ma jkun qatt bil-għatx” (Ġw 6, 35). 

Allura kif ser nagħmel biex ma nkunx iktar bil-ġuħ; billi ninduna jien x’ġuħ għandi. L-ewwel u qabel kollox irrid inkun sinċier miegħi nnifsi x’inhu l-ġuħ li hemm fija. Dan bħal meta jkolli aptit xi ħaġa; x’għandi aptit. Hawn min anke din isib diffiċli għax f’restorant isaqsik: “Inti, x’ser tieħu?” Biex imbagħad jieħu bħalek. Mistoqsija oħra hija: “Minn fejn ġej dan il-ġuħ?” Tajjeb li nitgħallmu nfittxu l-għeruq ta’ minn fejn ġej il-ġuħ tagħna. Imbagħad irridu niftakru li l-ebda ħaġa u l-ebda persuna fid-dinja qatt mhu ser taqtgħalna dan il-ġuħ li hemm fina. Fina dejjem hemm vojt, dejjem hemm sens li aħna mhux kompluti, u dejjem hemm solitudni li rridu nitħabbu magħha. Imbagħad nifhmu li l-iktar relazzjoni li tasal tissodisfalna dak il-ġuħ hija relazzjoni ma’ xi ħadd li huwa ’l fuq minn dak li aħna qatt nistgħu naħsbu jew nixtiequ! 

Hemm sigriet ieħor u dan jaffettwa kif aħna nħobbu lil xulxin – dawk li aħna nsejħulhom relazzjonijiet. Aħna nistgħu nħarsu lejn xulxin, qishom l-oħrajn huma xi biċċa ħobż, ċikkulata jew ġelat. Inħobbok, għax tagħtini togħma tajba, għax iġġegħelni nħossni aħjar, għax tissodisfa xi bżonn fija, għax hemm vojt li qed nimmaġina li int ser timlihuli. Allura tajjeb li meta nidħol f’relazzjoni ma’ xi ħadd, anke l-iktar waħda sempliċi ngħid: “Imma jien x’qed nistenna minn din il-persuna?” Malli jkollok ir-risposta għid: “Abbli dak li qed nistenna, din il-persuna wkoll għandha bżonnu, mela ma tistax tagħtihuli.” 

Noqogħdu attenti wkoll li aħna ma nippreżentawx ruħna quddiem l-oħrajn bħala dawk li nistgħu nissodisfaw kull bżonn tal-persuna l-oħra, inwieġbu kull mistoqsija, nagħtu sens lill-persuna l-oħra għal xiex tgħix, insiru aħna salvaturi. Hekk iktar kapaċi noħolqu dipendenzi milli relazzjonijiet. Niftakru! Ġesù Kristu, li jista’ jissodisfa kull bżonn tagħna, ħarab meta riedu jeħduh bilfors biex jagħmluh sultan. Lanqas Alla ma jippermettilek li tieħdu bilfors, għax dik mhix imħabba. Anzi, spiss u b’gost, Alla jħallik nieqes biex int tibqa’ tixxennaq għalih, u iktar ma tixxennaq, iktar tiġi purifikat, biex tkun trid lilu biss u mhux dak li jista’ jtik.

Naħseb li llkoll kemm aħna, bosta drabi nsibuna għajjiena. L-għeja ma tiġix biss mix-xogħol, imma hemm ukoll l-għeja li tħoss meta ħajtek tkun mogħtija lil xi ħadd. Tegħja tieħu ħsieb ’l uliedek jew il-ġenituri anzjani tiegħek. Tegħja tieħu ħsieb żewġek jew martek, l-iktar jekk intom it-tnejn anzjani u inti għandek farka iktar saħħa minnu jew minnha. Tegħja wkoll taqdi fil-knisja għax anke l-ministeru fih it-tħabbil il-moħħ u l-għeja tiegħu.

F’dan ir-rakkont li qrajna kemm Ġesù kif ukoll l-Appostli huma għajjiena. Il-Vanġelu jgħidilna li “Kien hemm ħafna nies ġejjin u sejrin, u anqas żmien biex jieklu ma kienu jħallulhom” (Mk 6, 31). Għalhekk Ġesù jipproponi li jmorru f’post imwarrab sabiex jistrieħu ftit. Mal-għeja tal-missjoni tal-Appostli, irridu nżidu l-għeja ta’ Ġesù, iktar ta’ natura psikoloġika milli fiżika. Ġesù huwa għajjien u mħawwad mentalment, għax fir-rakkont ta’ qabel dan, fil-Vanġelu skont San Mark, insibu li kien għadu kif ġie maqtul Ġwanni l-Battista, il-qarib ta’ Ġesù. 

Id-dixxipli jmorru ma’ Ġesù lejn post imwarrab imma l-break tagħhom ma tantx idum għax in-nies jarawhom sejrin u jaslu qabilhom ix-xatt l-ieħor. Ġesù jinżel minn fuq id-dgħajsa u jitħassarhom u jibda jgħallimhom ħafna ħwejjeġ. Nafu li wara li jgħallimhom jagħtihom x’jieklu wkoll. Ir-raġuni għaliex tħassarhom kienet “Kienu qishom nagħaġ bla ma għandhom ragħaj” (Mk 6, 34). 

Tassew li ma kellhomx ragħaj! Min kellu jieħu ħsiebhom kien fil-palazz, jiekol u jiffanga u jogħxa bl-ispettaklu li setgħet toffrilu t-tifla ta’ mart ħuh. U daqslikieku dan ma kienx biżżejjed jaqta’ ras ir-ragħaj, li fih il-poplu kellu fiduċja – l-Għammied. 

Ġesù huwa l-oppost ta’ Erodi u jieħu post Ġwanni. Huwa r-ragħaj li jgħallem u jitma’. Innutaw li darbtejn f’dan il-Vanġelu jissemma t-tagħlim. Meta jiġu l-Appostli lura mill-missjoni huma jirrakkuntaw kulma kienu għamlu u għallmu. Xħin Ġesù jinżel mid-dgħajsa jibda jgħallem. Hemm bżonn li r-ragħaj jgħallem lill-Appostli u lin-nies x’inhuma l-kwalitajiet ta’ ragħaj. Ir-ragħaj huwa dak li, minkejja li għandu bżonn jistrieħ, jagħżel li jservi. Hemm f’Ġesù l-ħtieġa li bil-kelma u bl-eżempju joħroġ fid-dieher x’inhuma l-kwalitajiet ta’ ragħaj veru. 

Dan it-tagħlim ma jistax joħroġ mill-palazz tas-Sultan, għax Erodi seta’ jgħallem biss kif tneħħi l-ħajja tal-profeta biex int tibqa’ tiekol u tixxala. It-tagħlim ta’ Ġesù jsir f’post imwarrab, fuq “il-ħaxix aħdar”. Ġesù jsir ir-ragħaj is-sabiħ li, kif jgħid Salm 23, “f’mergħat kollha ħdura jqegħedni, ħdejn l-ilma, fejn nistrieħ jeħodni; hemm hu jrejjaqni” (2). 

Ġesù ma jagħmilx parti mill-poter; il-poter neħħa l-ħajja tal-profeta u tefa’ n-nies f’sitwazzjoni miżera. Ġesù mhux fil-palazz. Ġesù lanqas hu fil-belt, imma joħroġ minnha, jaqsam il-baħar u jsib lin-nies mitlufa. Fi kliem Papa Franġisku, Ġesù jmur fil-periferija u jagħmel mit-tenerezza (kif jgħid l-istess Papa) ir-riga tal-aġir tiegħu. Illum, għada, bħall-bieraħ u għal dejjem, is-sejħa tal-Knisja u ta’ kull ragħaj tibqa’, li toħroġ mill-kumdità u taqdi. L-uniku poter li għandha l-Knisja jrid ikun dak tas-servizz, ħaġa, li fil-maġġoranza tad-drabi hija għamlet f’dawn l-elfejn sena, imma dejjem ittentata li tfittex u ssib rifuġju fil-kenn tal-kumdità. Ġlieda dejjiema u toħroġ ta’ nies kull darba li tagħżel l-alternattiva għall-poter. 

Ġesù huwa edukatur u l-edukatur qatt ma jserraħ rasu biss li l-istudenti tiegħu għandhom x’jieklu imma jserraħ rasu meta jara li għandhom sens għal xiex jgħixu. Jista’ jkun li tmut bil-ġuħ għax m’għandekx ħobż, imma jista’ jkun ukoll li tmut għax m’għandekx sens għal xiex tgħix. Jista’ jiġri li, jekk ħadd ma jiggwidak issib sens fil-ħajja, tibda tfittex is-sens f’affarijiet li flok jgħinuk tikber u tisbieħ, jisirqulek il-libertà u flok il-ħajja jippreparawlek it-triq għall-mewt u iva tmut b’żaqqek mimlija, imma tkun għext bla skop. 

Forsi, kull vizzju li jeżisti mhux ikel ikkontaminat li jipprova jissodisfa l-ġuħ li jkollna għal ftit sens fil-ħajja? Darba smajt li fi żmien ir-Rumani, l-Imperatur kien jieħu ħsieb jagħti ħobża kuljum lil kull ċittadin Ruman mhux biss biex jimlielu żaqqu, imma biex jagħlaqlu ħalqu. Ma’ dan kien iżid logħob b’xejn u spettakli għal kulħadd. Hekk iċ-ċittadini Rumani, b’żaqqhom mimlija u kuntenti bl-ispettakli, qatt ma kien ser jgħaddilhom minn moħħhom li jagħmlu xi rewwixta kontra l-Imperatur.

Ġesù mhux hekk! Ġesù jgħallem, anke jekk jaf li dak it-tagħlim jista’ jdur kontrih. Fil-proċess ta’ Ġesù, l-akkużi li nġiebu kontrih kienu tagħlimu stess.

Imma dan m’għandux jaqtgħalna qalbna. Il-vokazzjoni tal-profeta, hija dan ukoll. Il-profeta spiss jiġi akkużat bil-verità li jkun xandar. Il-profeta jaf li tagħlimu u kliemu faċli jduru kontrih, madanakollu ma jibżax u jibqa’ jxandar. Jalla aħna wkoll, xandara tal-Vanġelu, nibqgħu nemmnu “li mhux bil-ħobż biss jgħix il-bniedem” (Mt 4, 4).

Stramba din! Bagħathom b’ta’ fuqhom senduqhom! Imma Ġesù li jaf sew il-qalb tal-bniedem, jaf li l-ġid tal-art faċli jagħmel lill-bniedem skjav tiegħu u jnessih minn fejn beda u fejn għandu jasal. Matul it-triq, il-mibgħut għax-xandir tal-Kelma faċli li ċerti affarijiet li jiltaqa’ magħhom jinżlulu iktar ħelwin mill-vokazzjoni tiegħu li jxandar, u kapaċi jeħel magħhom u jinsa lil min bagħtu u għalfejn bagħtu.

Biex dan ma jiġrix Ġesù lid-dixxipli tiegħu jibgħathom tnejn tnejn biex f’każ li wieħed jinsa għalfejn qiegħed fit-triq, l-ieħor ifakkru. Jibgħathom tnejn tnejn biex ikunu ħarriesa ta’ xulxin. Kemm hu faċli li meta wieħed jagħmel missjoni waħdu, il-missjoni ssir tiegħu. Jekk ma jkunx hemm xi ħadd li jwieżnu fil-mumenti diffiċli, faċli jaqta’ qalbu. Jekk ma jkunx hemm xi ħadd li jumiljah xi ftit meta jaħseb li laħaq is-sema b’idu faċli li jibda jħossu perfett u jara lill-oħrajn dubbien. Faċli li jagħmel mill-missjoni tiegħu spettaklu u jinqeda biha biex isir popolari u jimla l-vojt li jkun qed jimla ’l qalbu. Meta x-xandir tal-Kelma jsir bejn tnejn, l-attenzjoni ma tkunx fuq wieħed waħdu u ħadd ma jseħħlu jisraq ix-xena. 

Ġesù jordnalhom biex ma jieħdu xejn magħhom. Meta wieħed jitlaq għall-missjoni mimli kumditajiet faċli ħafna li ma’ kull intopp li jsib fit-triq isib rifuġju fil-kumdità tiegħu, u ikbar ma jkun kbir ir-rifuġju iktar ikun diffiċli li joħroġ miż-żona ta’ konfort u stabbiltà tiegħu. Ġesù jordnalhom biex għat-triq ma jieħdu xejn magħhom ħlief ħatar. Il-ħatar huwa simbolu tal-fiduċja f’Alla u l-qawwa tiegħu. Mosè ma kellu xejn ħlief ħatar, imma b’dak il-ħatar (meta sar serp) għaġġeb lill-Faragħun. Bil-ħatar feraq il-Baħar l-Aħmar u ħareġ l-ilma mill-blat ta’ Meriba. 

Jekk tieħu xi ħaġa miegħek dejjem hemm ir-riskju li biex tiġi aċċettata l-Kelma twiegħed jew tagħti rigali, ovvjament għax għandek minn fejn tagħti. Imma r-rigali huma b’xi mod qarrieqa, għax bihom anke jekk ma tafx jinxtraw il-qlub. Imma meta jispiċċaw ir-rigali, x’jibqa’? Tibqa’ int b’Kelma li mhux tiegħek. Min jilqagħha jasal jilqagħha għax hija Kelma vera fiha nfisha u mhux għax magħha hemm marbut xi rigal jew sodisfazzjon. 

Ġesù jgħid ukoll li meta jidħlu f’xi dar jibqgħu fiha sa ma jitilqu minn hemm. Ġesù jrid li l-missjunarju, dak li mibgħut ixandar il-Kelma, qatt ma jħossu sid jew padrun imma dejjem mistieden. Meta wieħed ikun f’xi familja jrid jitlob għal kull ħaġa; jekk ma tawhx tazza fejn iferra’ boqqa ilma jrid jagħmel wiċċu u bi prudenza jitlob għal tazza. Ikun pastaż jekk jaqbad u jqum u jmur iġib tazza mill-cupboard tal-kċina. L-istess biex imur sal-bathroom irid jitlob permess. Ġesù darb’oħra qal: “Kulu u ixorbu milli jkollhom huma” (Lq 10, 7), iġifieri toqogħdux tagħżlu u tippretendu. 

Dan il-Vanġelu jrid jeħles lid-dixxiplu minn kull pretensjoni; id-dixxiplu ma jistax jagħmel il-kundizzjonijiet hu tal-missjoni. Ir-riferiment għal-libertà huwa wieħed ċar meta l-Mulej jordnalhom biex jilbsu l-qrieq. Meta Alla l-Imbierek jagħti l-istruzzjonijiet dwar kif għandha tittiekel l-ikla tal-Għid qabel it-tluq tagħhom mill-Eġittu, il-Mulej Alla jordna lill-poplu: “U tikluh hekk: qaddejkom imħażżma, bil-qorq f’riġlejkom u bil-ħatar f’idejkom u tikluh bl-għaġla. Din hi l-mogħdija tal-Mulej” (Ġen 12, 11). 

Ġesù jaf ukoll li matul it-triq id-dixxiplu ser jiltaqa’ ma’ diversi inkomprensjonijiet; u wieħed faċli jaqta’ qalbu meta jara li ħadd ma jrid jisma’ l-messaġġ li għandu xi jwassal. Ġesù jagħti ordni biex fejn il-messaġġ ma jintlaqax, meta f’xi post ma jintlaqgħux ifarfru t-trab minn taħt saqajhom. Xi jrid jgħid il-Mulej? Qed jgħidilna biex ma neħlux mal-falliment li l-Kelma ma ġietx milqugħa. Kemm jiġrilna li meta ma jaċċettawniex inħossuna falluti, naqtgħu qalbna u nieqfu. Imma f’dal-mument tajjeb insaqsu: “Imma jien fix-xandir tal-Kelma, x’kont qed infittex li niġi aċċettat jew li nwassal Kelma li bagħtuni nxandar?” Ġeremija jasal jistqarr: “Qarraqtni Mulej, u jien tqarraqt, kont aqwa minni u għelibtni” (Ġer 20, 7). Sant’Antnin ta’ Padova, meta ra li ħadd ma jrid jisma’, jispiċċa jipprietka lill-ħut! Allura Ġesù jippreparana mill-bidu għall-fatt li l-Kelma ser issib reżistenza minn ħafna. It-tentazzjoni tkun dejjem li tbiddel il-messaġġ biex ma tinqabadx waħdek. Imma, f’dak il-mument, tkun tlift il-messaġġ u begħt ruħek.

Id-dixxipli telqu jxandru u għadhom iterrqu sal-lum. Anke llum għad għandna dixxipli li jħeġġu għall-indiema, oħrajn li bil-preżenza tagħhom ikunu balzmu ta’ fejqan fl-ambjenti li jterrqu fihom. Oħrajn jiġġieldu l-ħażen u l-inġustizzji. Mhux dejjem faċli, hawn min ċarċar demmu biex ikompli jterraq u hawn min għamlulu ħajtu infern, imma baqa’ jxandar.

U int għadek itterraq twassal l-aħbar t-tajba ta’ Ġesù?